السبت, 21 سبتمبر 2019 04:20 مساءً 0 126 0
آلو منو؟ _ الكابتن طيار شيخ الدين ولقاء بالتفاصيل
آلو منو؟ _ الكابتن طيار شيخ الدين  ولقاء بالتفاصيل

عبدالمنعم  شجرابي

في الحوارات الصحفية التي كنت أجريها عبر الهاتف تحت مسمى (آلو منو) بصحيفة المستقلة.. كان لي هذا اللقاء في العام 2014م مع الكابتن طيار شيخ الدين محمد عبدالله الذي انتقل نهاية الأسبوع الماضي إلى رحمة مولاه. أعيد اللقاء عبر « اخبار اليوم» مع الرجل الأمة.. له الرحمة والمغفرة..

 { آلو منو؟
شيخ الدين..
 { ليه شيخ الدين كده حاف.. مش أحسن الكابتن شيخ الدين؟
ما في مانع الكابتن شيخ الدين، معاي منو
{  معاك شجرابي يا كابتن والاسم بالكامل لو سمحت؟
أهلاً وسهلاً بك شجرابي.. والاسم بالكامل شيخ الدين محمد عبدالله الطيب الفكي أبا سعيد
 { اتولدت وقريت وين يا كابتن؟
اتولدت في ديم القراي في 15/3/1938م ودخلت الخلوة فيها ثم كسلا الأولية سنتين ثم قسم الميرغنية الصغرى سنتين ثم أبوروف الأولية فأم درمان الأميرية الوسطى ووادي سيدنا الثانوية وقبلت بجامعة الخرطوم رياضيات وتحولت إلى دراسة الطيران.
{  نقيف هنا شوية يا كابتن أنت رقم كم في العائلة وأخوانك منو؟
 نحن ستة أشقاء.. ثلاثة أولاد وثلاث بنات.. وإخوة غير أشقاء برضو ستة ثلاثة أولاد وثلاث بنات وأنا رقم ثلاثة وأخواني الكبار الاثنين توفيا إلى رحمة مولاهم.
{  عندك منو من الأولاد والأحفاد ربنا يحفظهم ويغطيهم؟
عندي ياسر مهندس مدني وغادة اختصاصي أطفال وأمل مهندس معماري والأمين مهندس اتصالات يعمل بأمريكا وإسراء مهندسة كيميائية وكلهم متخرجين في جامعة الخرطوم وكلهم متزوجين والحمد لله وأنا وأحفادي مع أولادي معدودين في الجنة.
 {يا كابتن نرجع للطيران وأسألك الخلاك تختار الطيران شنو؟
 الظروف هي وحدها التي دفعتني للطيران وظروف والدي المالية ساقتني للطيران وبالمناسبة واحد صاحبي قدم لي وبعد التقديم طلبوني للمعاين..
{ المعاينة كانت كيف وسألوك من أيه؟
المعاينة من ثلاثة أشخاص خواجة واثنين سودانيين وسألوني عن عدة أشياء وكنت مسطح تماماً في الطيران لا عارف سودانير ولا عدد الطيارات ولا حتى المطارات وسألوني أنت عاوز الطيران ليه قلت عشان القرو..
 {بعد داك الحصل شنو؟
الحصل اختاروني من قائمة طويلة وكنا ستة رسينا على ثلاثة سافرنا للتدريب بإنجلترا لمدة 18 شهر وأنا اختصرت المسألة وعدت بعد 12 شهر ويوم واحد..
 {طوالي ياكابتن جيت ووقعت بالطيارة وللا اقول وقعت بيك الطيارة؟
القصة ما كده.. القصة يا أستاذ إني نلت الشهادة الأولى وللشهادة الثانية جاء الطيار الخواجة الممتحن وفي الحالات دي بيحصل العكس الكابتن بيقعد في الكرسي الشمال بدل اليمين والمساعد بيقعد في الكرسي اليمين بدل الشمال والحصل انو اخدنا اللفة الأولى وفي اللفة الثانية الطيارة وقعت بالعمارات على منزلين بالقرب من مقابر فاروق وبعد يومين وعيت ولقيت نفسي في المستشفى بعمر جديد.
 { يا ربي ده حصل عشان أنت ما قريت دعاء السفر؟
لعلمك أنا أول طيار أدخل دعاء السفر في الطيران وسودانير سبقت كل طيران الدول الإسلامية بدعاء السفر وبالمناسبة دعاء السفر جاءني بسبب تخوف الحجاج من الطيارة بل بعضهم لم يشاهدها أصلاً وكنت وقتها مساعد كابتن فاستأذنت من الكابتن الخواجة لقراءة دعاء السفر والدعاء المليء بالإيمانيات أدخل في قلوب الخائفين الطمأنينة والاعتدال..
{ اتفق معاك تماماً يا كابتن انو دعاء السفر بيدخل في جوف المسافر الطمأنينة بس عاوز أقول....
قبل ما تقول كثير من المسافرين وهم داخلين للطائرة وقبل قراءتي لدعاء السفر كانوا بدعوا لشيوخهم أن يلحقوهم وينجدوهم ودعاء السفر أعطاهم الطمأنينة الكاملة..
{ يا كابتن عندما بديت سودانير كان عندها كم طيارة؟
كانت تقريباً خمس أو ست طيارات.. كوميت وداكوتا..
 {المناصب التي تقلدتها؟
بديت بمساعد كابتن ثم كابتن ثم مراقب عمليات ومدير ضيافة ومدير عمليات أكثر من مرة ورئيس لمجلس الإدارة.
 {يا كابتن أنا ساكن امتداد ناصر يعني قريب جداً من المطار وممر هبوط الطائرات وما قاعد اهتم كثير بالطائرات.. وأظنك أنت عكسي مش كده؟
بالتأكيد عكسك تماماً وأي صوت طيارة طوالي بجذبني وأصنقع أعاين وده شيء طبيعي لطيار طار سنين طويلة..
 {يا كايتن فوبيا الطيران الخوف من الطيران ده عندو علاج؟
المرض ده موجود وناس كتير بتخاف من الارتفاعات والعلاج يبدأ بالوقوف أمام الطائرات بدون سفر ثم الطيران المتدرج والعلاج الأول والأكثر فعالية هو دعاء السفر.
 {بمناسبة دعاء السفر أنا سمعت هذا الدعاء بصوت المذيع المتمكن حمدي بدرالدين هل لا زال مسجلاً؟
أيوه لما الإنقاذ قامت سجل الدعاء بصوت حمدي بدرالدين وأنا ما عارف لو كان التسجيل موجود أم لا.. لكن أي واحد من الطاقم ممكن يقرأ الدعاء لو حافظ.
{  يا كابتن أنت كابتن ولكن ما كابتن؟
 كيف يعني..!
{ يعني كابتن في الطيران وفي الرياضة صفر؟
يا راجل استغفر الله أنا صغير مارست الدافوري في كسلا وفي المدرسة الأميرية كابتن وفي وادي سيدنا في الفريق الأول وكنت عداء وزول جراي جداً.. أنا رياضي ممارس للرياضة لحدي الليلة وكابتن وكابت..
 {ده عرفناه.. المناصب الإدارية الرياضية التي تقلدتها ما هي؟
عضو الاتحاد العام لكرة القدم ورئيس اتحاد الاسكواتش ورئيس اللجنة الأولمبية ورئيس الكشافة.
{ أها وفي نادي بري مسكت شنو؟
أنا تقريباً واحد من أبناء بري العريقة وبعد عودتي من دراسة الطيران كنت ناشط بنادي بري المحس الثقافي وبري الدرايسة الثقافي ونادي بري الرياضي الثقافي الاجتماعي وعملت بمجلس إدارة النادي قبل أسافر إلى الكويت.
{ يا كابتن شيخ الدين بصراحة شديدة وبعد أن طار أبناؤك لتخصصات أخرى هل ممكن تحث أحد أحفادك على دراسة الطيران؟
أوعك من دي..!
{ كفى الله الشر ليه ثم ليه ثم ليه؟
الطيران بعد الدراسة ممارسة وخبرة وللأسف البلد ما فيها شركات طيران عشان الطيارين المتخرجين يشتغلوا فيها ويمارسوا ويكتسبوا الخبرة.. وشركات الطيران الكبرى وحتى الأقل ما بتشغل طيار بدون خبرة.. عشان كده وأنا خبير الطيران أنصح بعدم دراسة الطيران على الأقل في ظروف حصار الطيران الحالية.
 {بصراحة أكثر يا كابتن عندنا طيارين ماهرين أم لا؟
ده كلامك عندنا أولاد ممتازين جداً وفي طيران القطرية وشركات الطيران العربية عندنا طيارين مرموقين.
 {يا كابتن كنت داير أسألك عن سودانير وعشان ما تبكي خليتك؟
شكراً ليك وأنت تحفظ دموعي.
{ أكل الطيارات جاهز عشان كده يا كابتن ما أظنك بتعرف تطبخ؟
كنت بعرف أطبخ زمن العزوبية ودلوقتي حياتي أتغيرت توتلي والحمد لله للأحسن وباكل جاهز وبس.
{ ولو قلت ليك كابتن شيخ الدين ما بيسمع غنا تقول لي شنو؟
أقول ليك كابتن شيخ الدين مستمع مرهف لعثمان حسين وكابلي ووردي.
{ لو قلت ليك أهديني أربع أغنيات تهديني شنو؟
أهديك محراب النيل والفراش الحائر لعثمان حسين وكسلا للكابلي ونور العين لوردي.
{ كابتن شيخ الدين وأنت تطير بي وأنا أطير معك في هذه المحادثة الحلوة لك أطنان شكري وتقديري..
أنت أيضاً لك أطنان شكري وتقديري أخي شجرابي.

 

 

 

سجل معنا أو سجل دخولك حتى تتمكن من تسجيل اعجابك بالخبر

محرر الخبر

eiman hashim
كاتب فى صحيفة أخبار اليوم السودانية

sss

شارك وارسل تعليق

الأخبار

بلوك المقالات

الكاريكاتير