يسرية محمد الحسن
بعض الرحيق.. والبرتقالة دكام 2-2.
دلفنا الي الداخل وسيده الدار تفسح لنا لنجلس في غرفه الاستقبال.....كل شيء في المكان يدل علي ذوق رفيع جدا .....ديكور هاديء الالوان ...ستائر الصالون بيضاء من قماش التل المطرز الفاخر ...اطقم الجلوس وكان صانعها فنان تشكيلي بارع ...فخامه لا نظير لها ممزوجه بالبساطه في كل شيء ...الاضاءه علي الجدران والسقف ......زهور طبيعيه من الروز البلدي ذي العطر الفواح وازهار النرجس البيضاء في تنسيق بديع وضعت بعنايه داخل المزاهير ...الطاولات يغلب عليها اللون الابيض غطت بمفارش بيضاء من قماش الجبيير المطرز الفخم عبق عطر الصندل يفوح ويملأ المكان بينما السجاد العجمي الفاخر تغوص فيه ارجلنا ...لوحات زيتيه لكبار الفنانيين التشكيليين علي الجدران في تنسيق مذهل ....احسسنا وكاننا داخل معرض لفنان عالمي ...صوت الموسيقي ينسرب الي اذاننا في هدوء مقطوعات لكبار الموسيقيين العالميين تعرفت علي احداها كانت لموزارت ..........يا مراحب اهلا بي اهلنا وحبايبنا ......الدكتور بشحمه ولحمه ....تسلم د. عوض اهلا بيك في بيتك ....عاجلته زميلتي المذيعه ....يا الله يا دكتور ايه الجمال والابداع ده كلوو ... روعه روعه والله بيتك مبالغه عدييل كده !!.. تسلمي ياراقيه هكذا رد مواصلا حديثه...البيت سكن للنفس اولا اذا ما كان مريح وجميل. الانسان بطبعه ملول وانا زوجتي ام اولادي سيده ذوقها رفيع جدا زي ما انتو شايفين ....لست انا من اختار بل هي...كل لمسه في اي ركن بالبيت من افكارها هي وكانها تقرأ افكاري ....الحمد لله ربنا اهداني اعظم زوجه وكان عند دخولها علينا تحمل حساءا ساخنا وضعته علي السفره لتعلق علي حديث زوجها ....واعطاني ايضا اعظم زوج...دون ان نشعر صفقنا ثلاثتنا بينما اطلقت احدانا زغروده فرح ..!!...تفضلو علي السفره القتها علينا سيده المنزل ....حينها بعد ان خرج عاد مسرعا دكتور عوض يحمل في يديه طبق تفوح منه رائحة شواء شهي وضعه في منتصف المائدة حالفا بالطلاق.....مرتي المصريه دي ما سوت الفطور سويتو ليكن براي ...اسالوها وهي تضحك. ونحن نشاركها الضحك ..........فطرنا الفطور الماخمج تخيلنا انفسنا في احد فنادق باريس الفاخره برستيج علي الاخر وطعام افرنجي مصنوع بمهاره فائقه ........بعد داك جاب لينا الدكتور شربوت حتي لون الشربوت. حقو ما بشبهه لون اي شربوت في اي بيت سوداني مهما علا وعظم شان اهل داره !!.. لونه برتقالي رويان ورائحته زكيه جدا مخلوط بقطع من فاكهه الاناناس الطازج .....ملا لنا كبابي كبيره جدا وحلف قال سويتو انا المصريه دي حلفت ليها الليله العيزومه دي ما تدخل يدها فيها كوولها بسويها براي يضحك ونحن معه وزوجته الجميله ..........يشيل ويكب لينا في الجرادل !! اقصد الكبابي الكبيره جدا وكل ما نشرب يخسمنا بسيدي الحسن !!!!.....يا زوووول بعد شويه نحن التلاته ما قادرين نقوم من الكراسي راسنا لف شفنا الصالون تلاته...تلاته !! كل شي تلاته حتي هو وزوجتو شفناهم تلاته نسخ !!......اغالب النعاس الشديد وانا اوجه له الحديث بصوت بالكاد يطلع مني ....انت يا دكتور ختيت لينا بنج في الشربوت ده ولا شنو ؟...زميلتيي الاثنتين واحده فيهن نامت عدييل في الكرسي وراسها متدل علي كتفها اليمين والتانيه نااامت !! اما انا فاحسست ان ساقيي لا تقويان علي حملي لانهض .....لما شافنا نجضنا مشي جاب التلفون اب قرص داك البي الشياله الزمان.. لكين هي امانه ما شياله ما بتشبهه حقاتنا المعشكبات ديلاك وانا انظر لها بنصف عين من شده ما عجبتني .........جلس قبالتنا .........الليله دي امانه ما وقعتن !!!......سوات فيها مذيعات ومخرجات واخر برستيج ....الليله دي ترا ده التلفون ......وضرب ليهو نمره !!.....الوو....ابو العزايم ؟...اسمعني سمح ....انا دكتور عوض دكام شوف عيني ما جابوهو لي مذيعاتك يسريه بت محمد الحسن. وفلانه بت فلان ومخرجتك علانه... طشموا. وسكروا وبعد شويه قالن راجعات لي دار الاذاعه عنهن شغل ...ارجاهن في خشم الباب ...وكان ما مصدقني. نفخن الهنابيب !!.....يقصد البالونات التي تختبر بها الشرطه السكاري بجعلهم ينفخون فيها الهواء ليحلل بعد ذلك للتاكد ان كان به كحول ام لا ... ..مواصلا حديثه وشفتا با ابو العزايم بعد داك شوف شغلك معاهن .......انا ما غردي حدثتك وكلمتك. شفتهن شوف العين سكرانات وطاشمات فل !!!....انقروا بعد داك رجعنا الاذاعه ؟.. حنسنتو. عليك الله يا دكتور. ما حاقدر اسوق العربيه. بخلي عربيتي هنا وبرسل راجلي يجي يسوقا. انت وصلنا........كان سقتها امكن اعمل حادث. راسي تقيل.......مااا غردي بيكن. زي ماجيتن. ترجعن !!... غايتو. ربكم ستر. وصلتا البنات كل واحده بيتا .....ماشا بي سرعه 40. الشارع كله. بتاعين الحافلات والملاكي يشتمو في المره البتتعلم في السواقه جديد ومعطله الحركه....ربكم ستر زغت لي من كم عسكري مرور. والا كانو ودونا القسم نفخونا الهنابيب !!!...وصلت بيتنا ونومه لي بكره....الصباح ثلاثتنا كنا في مكتب ابو العزايم وحكينا ليهو المقلب العملو فينا د. عوض ابو العزايم....ياحليلو. يضحك كما لم اره يضحك من قبل... قال لنا علمت من مكالمته انه مقلب ظريف. ........الا رحم الله صاحب البسمه والضحكه الضوايه والقلب النظيف ....النجم ...نجم نجوم الطب في بلادنا وايقونته ....الفخيم ذي السيره العبقه العطره ...دكتور عوض دكام واسكنه جنة الفردوس الاعلي....اللهم امين......
