الاربعاء, 04 مارس 2020 01:53 مساءً 0 155 0
تجوال حروف
تجوال حروف

عادل ابوالريش

وعُودِّك زَي وعُود موية القَّضارف  

{  كل ما يصبح صباح أو تهدأ أنفاس المسا ساعة الغروب
وتاني يرجع يِطل صباح تزقزق عصافير الشِّعِر
نكتب قصيدة مؤطرة بالأمل وعلى المزارع والمدارس نتجه  ولو حظنا كان سعيد نركب الهايس والهونداي والكريز
ومن بعيد لبعيد نمتِّع عيونا بمشاهد الخضار والفواكه والأخضر من البَّصل    وفجأة في الحافة نسمع صوت مذيع ما مقتنع ومجبور جبُر علي قراية الخَّبر وإمكن تكون  معاه أقوال صُحُف
ومن ما أسمع خبر خبر حل معضلة موية القضارف والكهربة في بورتسودان تستقر
طوالي أتذكر وعودك لما ترسلي لي مسِج
قال أيه !! أنا كلمت ناس أبوي وكمان وافقت أمي والأهل
قالوا أحسَّنتِ الإختيار  يا بتي إن شاء الله ما تشوفي شر
وأرجع أضحك وأبتسم وكل من في الحافلة يندهش
معقولة في الزمن الصعب لسه في ناس عندها مساحة تبتسم !
عليك الله يا هناية يا إنت من الوعود
ولو فكرت تجددي لي في الوعود
تسمعي بي ركبن البَّحر قااصِد هِجرة أوربا   
ألمانيا أو هولندا  أبدآ ما سَدّوا الدرب  قِدام مُهاجر كايس عمل بعد ما ضاع في وطنه الأمل
إمكن أصل  وإمكن كمان أغرق في مياه أفضل من آلام تكرار الوعود  
أنا شايف أحسن نفترق  لأننا أصلآ لا يمكن ننسجم
وخليك إنت مع عجاف الوعود ورضه لازم تعرفي في الدنيا دي أنا أبدآ ما آخر ولد  عشان حواء والدة على الأقل  مليار ولد  
معليش  أنا تاني ما بصدق وعود وولا كمان بغشاني الأمل
عليك الله كان تزعلي مني  وإنت عارف  إنو البجمعنا درب ما فيه كِضب  ولا في يوم كان بينا خصام جااب أجاويد ما ليها حد
أوا ما أصل هناك من ألمانيا برسل ليك خطاب  والعجب العجاب لو لمحت ميركل من بعيد تكون الحروف نديانة ريد  
ومن هولندا ممكن اجيب داف سعة الحمولة خمسة طن من الأسمن والسيخ والطوب الحراري الببني الشقق   
ولو خلاص حار بي الديل   بَعًرج علي دولة من دول الخليج أجيب كامري أو حافلة من نوع المِّرِق  تشتغل في خط الحاج يوسف  الإستاد ومرات نسرق خط لي مايو بالستين أو شوارع الهوا الفيها مخارج من إيصال المرور  رغم التصرف فيهو خطأ كبير
بالحالة الشايفها دي ما عندك طريق غير تشلي الصَّبُ وتدعو لي في كل صلاة تقولي  يا رب تَرجعوا لي غانم معافى ومنتصر  
حقوق الملكية تتبع لي أنا بصورة شخصية ، وحذاري من (ينط) فيها ملَحّن من إياهم ) ويهديها ل لأي (قونَّة ترفعها في صفحتها في الفيس بوك أو االانستغرام  .. خلو بالكم أخبار اليوم دي   جريدة واسعة الإنتشار  ربنا يبارك ويزيد ،الإنتشار الواسع لا يتيح  (للمتلربصين)  التَّغول على حقوق الغير
{   لا أدري والله  لماذا يصر البعض على عقد مؤتمرات صحفية لتوضيح بعض أسباب ضائقة حلَّت بالبشر من ناس محمد أحمد وغيرهم من ناس الوسطية الما عارفين أنفسهم  فقراء أم أغنياء يمكنهم تدبير معيشتهم إذا صحّض وعد وزير المالية بمضاعفة الأجور وتقليل نسبة التضخم ومحاربة الجشع وتوفير السكر والدقيق ، بالطبع هذا ليس  كلام  أهل الحرية والتغيير لوحدهم بل هو نتاج تراكمات من الذين  عملوا للدنيا وووعدوا الناس بانهم لا لدنيا قد عملوا لكننا كشفنا الدور
{ جماعة الحرية ديل لو مشوا غلطوا أو واصلوا في بطء توضيح الحقائق وتغيير الحال للأفضل  بدرجة يشهر فيها المواطن بأن التغيير أمرآ حقيقيآ يمشي على قدمين  وإلا .. سيكون وصف الشعب لكم كما وصف الذين من قبلكم وأعلموا تمامآ أن الدائم هو الله تعالى والبقاه له وحده ، أعملوا حسابكم وحاسبوا أنفسكم قبل أن تُحاسبوا في الدنيا والآخرة ، غايتو إنت مخيرين يا تمشوا عديل يا كمان (تعرفوا حاجة)  
0911013333

 

سجل معنا أو سجل دخولك حتى تتمكن من تسجيل اعجابك بالخبر

محرر الخبر

hala ali
كاتب فى صحيفة أخبار اليوم السودانية

sss

شارك وارسل تعليق

الأخبار

بلوك المقالات

الصور

الكاريكاتير